Plantun de Prouvènço

Pèr coumpara dos planto d'encò nostre

Raphanus raphanistrum subsp. landra & Myosotis laxa

Ravanello

Raphanus raphanistrum subsp. landra

Brassicaceae Cruciferae

Àutri noum : Ravanasso, Ravaniscle, Rafanello, Ravanet.

Noms en français : Radis maritime, Radis sauvage.

Descripcioun :
La ravanello èi lou cousin fèr di rais-fort. Trachis dins lis ermas, en ribo de camin e peréu proche de la mar. Se recounèis à si petalo que s'estrechon (à ounglet), si fueio pelouso coumpausado de 2 à 8 paréu de tros prefound e subretout à si fru acaba emé un bè, ço que lou destrìo dóu gènre proche Brassica. Coumpara emé la subsp. raphanistrum que ié sèmblo.

Usanço :
Tout èi manjadis dins la ravanello. Li flour e li jóuini fueio en ensalado, li fueio mai vièio (mai pas trop que pièi soun amaro), cuecho, li jóuini fru peréu. Se fai uno meno de moustardo emé li grano que se manjon peréu greia.

Port : Grando erbo
Taio : 15 à 80 (100) cm
Fueio : alterno
Tipe bioulougico : Teroufite
Cicle bioulougico : Planto de l'an

Gènre : Raphanus
Famiho : Brassicaceae
Famiho classico : Cruciferae

Ordre : Brassicales

Coulour de la flour : Jauno
Petalo : 4
Ø (o loungour) flour : 1 à 1,5 cm
Flourido : Printèms - Estiéu

Sòu : Ca
Autour basso e auto : 0 à 600 m
Aparado : Noun
Remarco : Planto de coustiero
Mai à setèmbre

Liò : Ribiero - Mar - Champ - Camin
Estànci : Termoumediterran à Mesoumediterran
Couroulougi : Mediterrano-atlantico
Ref. sc. : Raphanus raphanistrum subsp. landra (Moretti ex DC.) Bonnier & Layens, 1894

Te-vese-e-t'ame(-fourro-bourro)

Myosotis laxa

Boraginaceae

Àutri noum : Ti-viéu-e-t'aìmi, Uei-de-l'enfant-Jèsu.

Nom en français : Myosotis gazonnant.

Descripcioun :
Aquéu te-vese-e-t'ame, pulèu rare, trachis en ribo de ribiero, dins li prado umido e li roubino de palun. Emé si péu contro li sepalo se destrìo dis aùtri Myosotis di flour pas trop grosso. Tambèn, i'a ges de bratèio dins l'enflourejado e lou "calice" crèis proun après la flourido.

Usanço :
Li flour podon se bouta dins lou mesclun. Se dis que li te-vese-e-t'ame soun vertuous contro l'enflamacioun, majamen pèr lis iue ("principe di signaturo").